|HOME|

 

MABINI GIRLS

 

Iskrip nina Augie Rivera, Jr. at Che Vista

Titik nina Melo Torres, Augie Rivera, Jr. Joel Sevilla, Che Vista at Maan Juat

 

 

MABINI GIRLS

(Ang Musikal)

 

Iskrip nina Augie Rivera, Jr. at Che Vista

Titik nina Melo Torres, Augie Rivera, Jr. Joel Sevilla, Che Vista at Maan Juat

Musika nina Ricky Ibe, Boron Garcia, Kismet Icagasi, Ging Candaliza, Blaise Gacoscos, Butch Alvarez

Sayaw: Ricky Ibe, Jasper Aviso, Christine San diego

Direksyon: BEHN CERVANTES

Katulong na direktor: Melo Torres

 

Tagpuan: Mga kalsada ng Ermita

Mga tauhan:

Yosi Vendor

Waitress

Singer

Dancer

Callboy-nobyo ng Singer

Bugaw-Nobyo ng Dancer

Pari

Politicians

Mga Manang (4)

Mga Puta (8)

AIDS victim

Inang Probinsyana

Mga Inang Kunsintidora (4)

Doktor

Mga Nars (4)

Mga Pulis (4)

Mga Kontestant (4)

Emsi ng Kontes

Mga Macho Dancers (3)

Mga Aktibista (10)

Mga Dayuhang Parokyano (10)

Mga Batang Prosti (3)

Prodyuser na Peke

 

 

Mabini Girls

 

Act I

 

Scene I

 

Maririnig ang "takatak" ng Yosi vendor, ang tagapagsalaysay ng buong dula, mabagal muna at pagkatapos ay pabilis nang pabilis. Kasabay nito ang unti-unting pagliwanag sa kinauupuan ng Yosi vendor, tapos ay sa buong entablado. Hihinto sa pagtakatak ang Yosi vendor, aawit ng "Ermita Noon." Makikita ang eksena (tableaux) sa isa sa mga kalsada ng Ermita CIRCA 1960’s (May mga nagtitinda ng prutas, handicrafts, antiques, souvenirs, mga Mabini Act etc. may Ilan ding mga otel, coffee shops, restawran (e.g. "Los Indios Bravos.")

 

YOSI VENDOR: "ERMITA NOON"

Titik ni Melo Torres

 

Ermita, ito ang Ermita

‘Sing ganda ng dalagang Pilipinas

Ang banal niyang kaisipan

Dulot ng abang simbahan

 

Ermita, aking Ermita

Unti-unting gumiginhawa

Sari-saring paninda

Ang ‘yong pag-anyaya

 

Mga prutas, handicrafts

Mga larawan at antigo

Taglay nila’y pangarap

At talinong Pilipino.

 

Sa Ermita’y matatagpuan

Sa Coffee shops at restawran

Mga simbolo ng kaunlaran

Siyang pang-akit sa dayuhan

 

Ipapakita ang mga pagbabagong nagaganap sa Ermita sa pamamagitanng pag-ikot ng backdrop. Lalabas ang mga tao at maiiwan ang Yosi vendor na magmamasid. Ang eksena’y magiging Ermita CIRCA 70’s tapos ay 80’s. pasok ang mga tao – dayuhan, puta, bakla, callboy, marino, batang pro, etc. ang lahat ng ito’y malungkot na minamasdan ng Yosi vendor. Hindi siya pansin ng mga tao. Lalamlam ang ilaw at matitirang maliwanag ang kinatatayuan niya. Aawit ang Yosi vendor ng "Ermita Ngayon."

 

YOSI VENDOR: "ERMITA NGAYON"

Titk nina Melo Torres at Maan Justo

 

Ermita, ikaw nga ba?

Ba’t nagbago na?

Bakas ng ‘yong nakaraan na kay ganda

Nasa na Ermita?

 

Aking ermita

Ikaw ay di ko na kilala

Ang dati mong karangyaan

Ay isa na lang ala-ala

 

Ref. Nasaan na ang nakalipas

Noong kahihiyan ay may halaga

Noong iniingatan pa

Ang respeto sa sarili

Ano na ang nangyari?

Nasa’n Ermita, o, nasan ka?

 

Malalakas na tugtugan, mga ungol at yugyugan

Babaeng dating maselan, hinhin ay kinalimutan

Lumang Ermita’y di na puwedeng ibalik

Natulog siyang ginto, at gumising siyang putik.

 

Liliwanag ang buong entablado. Papasok ang 3 binibini na magkakaibigan, at kakanta ukol sa kanilang mga pangarap at ambisyon. Tatabi sa isang sulok ang Yosi vendor. Magiging back-up dancers ang tableaux.

 

Waitress, singer, at dancer "Ermita, o, Ermita"

Titik ni Melo Torres

 

SINGER AT DANCER: Ermita, o, Ermita

Ika’y tanging pag-asa

Sa’yo makakamtan

Tansong kapalaran

 

Ermita, o, Ermita

Sa’yo ako sasama

Sa’yo matatagpuan

Aking kinabukasan

 

SINGER: Ako ay aawit

Tinig ko’y mapang-akit

Ang trabahong pagkanta

Lunas sa problema

 

Ako ay magiging singer

Nang merong maitutulong

Sa pa,ilya ko sa Baler

Na lagi na lang nagugutom

 

DANCER: Ako ay mananayaw

Masdan ang aking galaw

Sa aking pag-indak

Umaasa ang aking mag-anak

 

Dahil sa pagsasayaw

Kikita nang malaki

At pagdating ng araw

Makakaahon din kami

 

WAITRESS: Ermita, o, Ermita

Lahat pinapakita

Tinig galaw at katawan

Mapagkakitaan

 

Ermita, o, Ermita

‘Wag ka na ngang mambola

Nalalaman na ng lahat

"Yang sakit na ‘yong kinakalat

 

Ako ay waitress kun

Na nagbabalatkayo

Nang hindi naman mabisto

Ang tunay kong trabaho

 

Hindi ako pihikan

Lahat ay papatulan

Hapon, Kano’t Iranian

Awstralyano’t kababayan

Basta lamang sa unahan

Di dehado ang puhunan

 

Papasok ang mga puta: Kakanta at sasayaw

 

MGA PUTA: "Hello, Hi, Joe!"

Titik ni Melo Torres

 

Hoy mundo kamusta ka?

Hanap mo ba’y konting ginhawa

Kung laman ang ‘yong gusto

Halika na’t magdo-do na tayo.

Depende sa presyo! at depende sa serbisyo

Ayoko ko nang nagdedehado at patingin muna ng pitaka mo!

 

Hoy mundo! ‘tangna mo!

Akala mo kung sino kang gwapo

Sige na’t pumayag ka na

Kahit na lang limampung piso

 

Hoy supot! Lumapit na!

Hilig mo ba’y konting romansa?

Ang katawan ko’y nakaka-l

Tikman mo at makakaraos ka

 

Kumpletong rekado at halos parang bago

Malinis at bagong paligo at syempre pa, may pink card ako

Hoy Mundo! Tangna mo! (3x)

 

YOSI VENDOR:

Buhay sa Ermita

Ay sadyang ganyan

Puri, laya, kaluluwa

Lahat nababayaran

 

Papasok ang mga dayuhang parokyano nila. Sayawan, halikan, anuhan at kung anu-ano pang kalaswaan. Pasok din ang mga bakla, callboy macho dancers, etc. Patuloy pa ang kalaswaan hanggang biglang darating ang mga pulis RAID!!! Kasama sa mahuhuli ang waitress. Pasok ang mga bugaw at kakausapin ang mga pulis. Maglalagay. Aalis ang mga pulis. Aawit ang yosi vendor.

 

YOSI VENDOR: titik ni Che Vista

O hayan nakita nyo na?

Ganyan dito sa Ermita

Hindi lang mga kalaswaan

Pagbebenta ng katawan

Sentro pa ng kabulukan

Uso pati na lagayan

 

Walang magawa ang mga pari

O government authority

Sila ba ay masisisi?

Di na uso ang byani

Kung anak ay umuuha

Kahit pride ay nginunguya

Lahat ay masisikmura

 

Lagayan, lagayan

Puta bugaw matrona

Lagayan, lagayan

Pulis, pari, buong Ermita.

 

SCENE 2

 

Madaling araw. Walang masyadong tao sa kalye. Papasok ang ilang manag na patungong simbahan. Ang mga dayalogo’y bibigkasing parang sa pasyon.

 

Manang 1: O mapagpalang kalangitan

Bakit kay ginaw naman

Manang 2: Ooooo…o nga! Ooooo…o nga!

Sumusumpong ang rayuma

Bakit kasi ‘tong si Iluminada (manang 3)

Gusto’y kanyang unang misa

Manang3: Bakit hindi? Ayaw nyo noon?

Sa atin din ang unang ambon

Ng indulhensya ng kalangitan:

Kalinisan at kabanalan

Manang4: Siyanga naman! Tama siya roon!

At tayo rin unang makakakita

Kay father na kagandang lalaki

Na kinindatan ako kahapon

Manang3: Hay naku! Magtigil Ka!

Sa akin yata laging nakatingin

Baka ang ibig mong sabihin

Pumikit ng makita ka

(tawanan)

 

Hihintp ang tawanan kapag pumasok ang mga puta kasama ang waitress. Magbubulungan ang mga manang, pagkatapos ay magpaparining. (ala pasyon)

 

Manang1: Hindi nyo ba napapansin?

Sumama yata’ng ihip ng hangin

Manang2: Ooooo.o nga! Ooooo…o nga!

Ako yata’y masusuka

Manang3: Mahabaging langit!

Ito ba’y parusa?

Di ko na yata makakaya.

Manang4: kaya pala, kaya pala

Ako rito’y nangangati

May dumagsang binibini

Binibining binibili

 

Gaganti ang mga puta. Sarkastikong irap ang kanilang mga dayalogo

 

Puta1: Hukliban! Hukluban!

Mga huklubang ito!

Puta2: Kulubot!Kulubot1

Mga amoy utot!

Puta3: Ang panghi, Ang baho!

Daig pa ang binuro!

Puta4: Ang panghi, Ang baho

Nasusuka ako

Waitress: Ganyan talaga ang amoy

Nang napaglipasan ng panahon

Amoy kili-kili

Binibining binubuni!

 

Maggigirian ang mga manang at mga puta na parang mga manok na magsasabong. Pagkatapos ay mag-aaway sa pamamagitan ng awit sayaw at galaw

 

MGA MANANG: "BB. BINIBILI"

Titik ni Augie Rivera, Jr.

 

Hesus! Marya! Hosep!

Ano to ng umihep?

 

Ke babahong mga usok!

Ang dala nito ay bulok

Masama sa katawan

Masama pa sa lipunan

 

Babaeng makasalanan

Hindi natin kailangan

Ang lipunang nabubulok

Ay muli pang pagtibok

Hesus! Marya! Hosep!

 

Ke haharot sa ibabaw

Ng isang entabladong mapusyaw

Ang umiinog na ilaw

Saliw ng kanilang malaswang sayaw

 

Marya Clarang kagalang-galang

Karangalan ay biglang nawindang

Salapi ang kabayaran

Sa nawarak nilang mainit na kandungan.

 

MGA PUTA: "BB. BINUBUNI"

Titik ni Augie Rivera, Jr.

 

Hesus! Marya! Hosep!

Ano nga ba tong umiihep?

 

Mga bungangang bagong nguya

Ng bebulgam ng matatanda

Mga ngipi’y nagkulay lupa

Hininga’y amoy hipa

 

O sayang sinauna

Amoy naptalina ka!

Sobrang pagkukunwari

Naagnas na ang ngiti!

 

Mga balakang na nirarayuma

Mga tuhod na pasa-pasa

Mga daliring di na magsawa

Sa butil ng rosaryo’t kandila

 

Ang galapong sa tapayan

Nangulila sa gilingan

Hanap pa ang katuparang

Maging sang putong malinamnam.

 

Matitigil ang pag-aaway ng dalawang grupo kapag kumalembang ang kampana ng simbahan. Mapapayukong tila mananalangin ang mga manang at mga puta. Bahagyang didilim. Aawit ang Yosi Vendor.

 

YOSI VENDOR:

Nasaan na ang nakalipas

Noong kahihiyan ay may halaga

Noong iniingatan pa

Ang respeto sa sarili

Ano na ang nangyari

Nasa’n Ermita, o, nasaan ka?

 

SCENE3

 

Ermita sa umaga. Maririnig ang tilaok ng manok at liliwanag ang buong entablado. Aawit ang mga puta. Kasabay nito ay papasok ang isang mabilis na sayaw. Pasok ang mga dyanitor, tourists, money changers, etc. upang ipakita ang business ng Ermita sa umaga. Ipapakita rin sa sayaw ng ang mga puta ay ginagamit at inaabuso kahit sa pagtulog. Sa kanilang pagtulog, sila ay magiging set pieces—mga silya, mesa counters, etc. na gagamitin ng mga tao sa umaga.

 

MGA PUTA: "UMAGA NA"

Titik ni Augie Rivera, Jr.

Umaga na! Umaga na!

Matulog na’t magpahinga

Manay maya-maya

Ay trabaho na gaga

Umaga(2x)

 

Umaga na! Umaga na!

Konting tulog at pahinga

Ang tangi naming kailangan

 

Umaga na! Umaga na!

E ano ngayon sa amin

Ang umaga ay gabi pa rin

Ang gabi ang araw namin!

(Gabi, araw…Araw, gabi)(2x)

 

Umaga na! Umaga na!

Matulog na’t magpahinga

Magpahinga na’t matulog na

Matulog na’t magpahinga… ho hummmm..

 

Tamang-tama matapos ang awitin ay set pieces na lahat ang mga puta. Magpapatuloy ang eksena ng Ermita sa umaga sa pamamagitan ng mga galaw. Papasok ang dancer na may hawak na karatulang "Wanted: Dancer". Lalapitan niya ang mga tao at magtatanong. Lalapitan din niya ang bugaw pero hindi siya papansinin ng lahat ng mga ito. Biglang magsasayaw ang dancer para mapansin. Maya-maya’y kasayaw na niya ang bugaw. Pagkaraan ng ilang sandali ay biglang maririnig ang "takatak" ng Yosi Vendor. Lalabas ang mga tao at maiiwan ang mga puta. Pasok ang musika ng "Ermita Ngayon". Unti-unting magkakabuhay ang mga ito. Bahagyang lalamlam ang ilaw. Hapon na at ilang oras na lang ay mabubuhay na muli ang Ermita. Makikita ang mga puta na nag-aayos ng sarili. Unti-unting hihina ang musika at papasok ang malalakas na sigawan ng mga aktibista.

 

SCENE 4

 

Padating ang mga aktibista na patungong US Embassy at minabuting dumaan sa lugar na iyon upang anyayahan ang mga puta na sumama sa kanila. May dala silang mga streamers atbp.

 

Mga Aktibista: Sumama na kayo! Sumama na kayo!(4x)

Mga puta! (Mag-alsa)

Mag-alsa! (Mga Puta)

Puta1: Anong problema ng mga ito?

Puta2: Hoy! Ano bang gusto nyong palabasin?

 

MGA AKTIBISTA: "BASE MILITAR"

Titik ni Augie Rivera, Jr.

Mga dayuhan sa aming bayan

Panay ang panlolokong kami’y iniingatan

Di nyo ba alam, kami’y lalaban

Kaya’t isisigaw, ipaglalaban nang malaman ninyo na…

 

Ang base nyo! Ang base nyo!

Di namin gusto

Wala namang umuunlad kundi ang interes ninyo

Inyong dolyar, armas nukleyar

Alisin nyo na ! kundi ngayon, kailan?

 

‘tang ina nyo! Itigil nyo na yang

military aid na strings attached naman

bakit ba ganyan, pinoy ay di alam

na sa pag-alis nila’y malapit na ang layang inaasam…

 

PUTA AT TIBAK: "SAGUTAN"

Titik ni Che Vista

 

Aktibista: Yes, yes yo! (2x)

Sumama na kayo!

Mga puta, mag march dito

Halina at kalagayan ay baguhin nyo

(Repeat 2x)

 

Puta: Ano, ano, sino ba kayo?

Ano na namang kaguluhan ito?

Kung walang magawa sa buhay nyo

‘wag na kaming pestihin dito

 

A: No, no, po! No, no ho

Hindi po kami nanggugulo

May gusto po kaming sabihin sa inyo

Sana kami’y pakinggan ninyo

Dahil ito’y para rin sa inyo

 

Waitress: No, no, no, no, no, no, no, no

Ayoko! Ayoko! Di namin type ang makinig sa inyo

Dahil marami pa kaming gagawin

At baka ma-bad-trip ang kustomer namin

 

A: Mga Kapatid! Hey you there, yes you there kayo ay makinig

Hindi kami namimilit

Bukas ng Baya’y

Sa laban ng walang humpay

 

P: Say no! Ayaw namin!

Di nyo kami kayang bilhin!

Kayo kayo’yu lumayas na

At baka kayo’y ma-dead ma

 

A: Say, say… I say

Salot! Salot!

Ang mga base militar, Hindi kayo ang mga star

Kayo ay mga kawawang biktima dito sa invention war

Ng nabubulok na sistema, hoy tita, matauhan ka

 

W: Mga gago! Mga bobo!

Asa pa kayo! Na makikiisa kami sa mga tulad nyo

Alis, alis, Alis diyan

At kami’y nababato

 

A: Ulitin ang may*

 

Kami ngayon ay aalis

Ngunit adhikai’y walang mintis

Bagay na ito’y pakaisipin

Balang araw ay malalaman nyo rin

Kahit mundo ay baliktarin

Tama pa rin ang sinasabi namin

 

SCENE 5

 

Papasok ulit ang mga aktibista (iba na ang mga damit) upang mag-ayos na mga dekorasyon atbp. para sa eksena ng pista. Sa gitna ng entavlado ay may isang makeshift stage, nakatayo rito ang emsi. Maraming taong nakapaligid sa stage, kabilang dito ang Singer at Callboy, gayundin ang Dancer at ang Bugaw na naglalampungan.

 

EMSI: (rap eklat) ala super sonic

Mga Kaibigan

Mga Romano

Mga Kababayan

Mga Pilipino

 

Heto na, heto na

Ang pinakahihintay ninyo

Magagaling na mang-aawit

Ginintuang bingwit

 

Kaya’t tama na ang sobrang suspense

Pagka’t lahat tayo ay nate-tense

I say let’s start and let’s begin

Paligsahan sa pagkanta’y panoorin

Yeeeheeeyyyyy!!

 

Habang kumakanta ang kontestant #1 ipapakta sa isang sayaw ang pagtatagpo ng Singer at ng Callboy. Matapos nito ay kakanta ang Singer ng "Tulad ng Isang Pangarap":

 

SINGER: "TULAD NG ISANG PANGARAP"

Titik ni Che Vista

 

Kay tagal kang hinintay

Hinanap kung saan-saan

Kay tagal nang panahong

Walang napupusuan

 

Tulad ng isang panaginip

O pangarap na kay layo

Nakapiling sa pag-idlip

Paggising naglalaho

 

Ngayong ikaw ay naririto na

Mundo ko ay nag-iba

Ang puso’y binigyang buhay

Damdami’y binigyang kulay

Binigyang pag-asa

Pangarap ay naaabot na

 

Kaytagal kang hinintay

At ngayon nga’y natagpuan

Habambuhay ikaw lamang

Aking mapupusuan

 

Tulad ng isang pangarap

Ikaw lamang ang dalangin ko

Ngayong ikaw ay natupad

‘wag na sanang maglaho

 

Sana’y huwag nang lumisan

Buhayin ang katauhan

Aking pangarap, huwag akong iwan

Maging akin magpakailanman.

 

Habang kumakanta ang kontestant #3, ipapakita sa pamamagitan ng galaw ang eksena ng Singer, Prodyuser na peke at Callboy. Inaakiy ng prodyuser na peke ang Singer na sumama sa kanya upang sumikat; ayaw siyang payagan ng Callboy. Pagkatapos ng kontestant #3 papasok ang emsi upang ipaalam ang 5-pagitan. Aawit ang panauhin mula sa showbiz.___________

Pagkatapos ay ipapahayag ang nagwagi. Ang Singer syempre. Kakanta uli ang Singer. Pagkatapos ay lalabas siya kasama ang prodyuser na peke. Maiiwang malungkot ang callboy. Maya-maya’y papasok ang isang matrona. Sasama ang Callboy. Aawit ang Yosi Vendor.

 

YOSI VENDOR:

Nasaan na ang nakalipas

Noong kahihiyan ay may halaga

Noong iniingatan pa

Ang respeto sa sarili

Ano na ang nangyari

Nasa’n na Ermita, o, Ermita

 

SCENE 6

 

Bahagyang didilim ang entablado. Magbabalik ang dating Ermita sa gabi. Kaunti pa lamang ang mga putang makikita at isa rito ang Waitress. May 2 o 3 parokyano ang darating at makukuha ang ibang puta. Matitira ang Waitress na naghihintay pa rin. Ang yosiboy ay magmamasid sa lahat ng pangyayari. Aawit ang Yosi Vendor.

 

YOSI VENDOR:

Ang kawawa nating Callboy

Iniwan ng sinisinta

Ano pa bang magagawa

Kumapit na sa matron

 

May pag-asa pa nga kaya

Sa pagiging manganganta

Sa labas ng Ermita

Anong magiging buhay niya?

 

Ano kayang mangyayari

Sa ating singer na seksi

Huwag lamang kayong aalis

Abangan babalaik kami.

 

TIME WARP. Ipapakita ang pagdaan ng panahon sa pamamagitan ng sayaw galaw pagpapalit ng ilaw at set.

 

Makikitang pabalik ang singer na malungkot na malungkot at may ilang pasa sa katawan. Hindi pala totoo ang lahat ng ipinangako ng prodyuser. Aawit ang Singer:

 

SINGER: "PAGSISISI"

Titik ni Joel Sevilla

 

Buong Akala ko ang hatid niya ay galak

Yun pala ay putikan din ang aking bagsak

Huli na nang malaman kong siya’y nanananso

Buong pagkatao pala niya’y tubog sa ginto

 

Simple lang naman ang gusto kong pagbabago

Pero wala ring nangyari sa tanging pag-asa

Ano pa nga ba ang nararapat kong gawin

Ang mga pangarap ko ay laging nabibibtin

 

CALLBOY: "PAG-ASA"

Titik ni Joel Sevilla

 

Patuloy pa rin ang pag-ikot ng daigdig na ito

Huwag kang mag-alala at makakaahon din tayo

Panibagong buhay para sa ating kinabukasan

Tibay ng dib-dib ang sandata sa tatahaking daan

 

SINGER AT CALLBOY:

 

Ating iiwan ang mapait na buhay na ito

Bago tayo tuluyang malubog sa gulo

Habang may hininga ay may pag-asa tayo

Na matagpuan ang sarili nating mundo

 

Papasok naman ang Dancer at ang nobyong Bugaw. Masaya silang aawit tungkol sa kanilang plano na pagpunta ng Dancer sa Japan. Ang Bugaw ang umasikaso ng mga Papeles. Makikinig ang Singer at ang Callboy.

 

DANCER "JAPAN"

Titik ni Joel Sevilla

 

Paalam sa lahat kong kaibigan

Sosyal kong kagandahan, tutungo sa Japan

BUGAW: Siyang tunay, sa Japan ay aprub ang buhay

Umayaw ka at tatanggi sa palay

DANCER: Maraming salamat Ermita sa mga alaala mo

Sa aking pagbabalik ay donya na ako

BUGAW: Malaki ang kikitain, huwag mo nang palampasin

At hindi magtatagal, tayo ay makakaahon

DANCER AT BUGAW: Ito na marahil ang sweteng pinakahihintay natin

Sa Japan lasap ang tunay na ginhawa

Hoy sakang, kami’y narito na!

 

Ang apat na mangangarap ng Bagong Buhay habang ang Yosi Vendor ay masayang nagmamasid. Walang pakialam ang Waitress at ang Bugaw.

 

SINGER, CALLBOY, DANCER, BUGAW AT WAITRESS:

"BAGONG BUHAY"

titik ni Joel Sevilla

 

S: Ang mga mata’y mulat na sa katotohanan

Ngayon natagpuan ko ang liwanang sa karimlan

W: At sinong nagsabi na may liwanag sa dilim

B: Ang buhay sa labas ay mas makulimlim

D: Kahapon ko’y nagdaan na walang kabuluhan

Ngunit ngayon ay gising na ako sa katotohanan

W: Matulog ka uli at baka bangungot lang ‘yan

B: Tumigil ka na sa iyong kahibangan

C: Panahon na upang tayo’y lumisan sa putikan

Mga pangarap natin ay biglang kahulugan

W: ‘Wag kayong mangarap ng hindi kayang abuti

B: Kahit ano ang inyong gawin, sa putahan din kayo pupulutin

KORO: Mapait na kahapon ay atin ng iwan

Hanapin natin ang tunay na kaligayahan

Di na muling dadaan sa ganitong uri ng landas

Tuwid na pamumuhay ay ating taglay hanggang wakas

 

Aawit ang Yosi Vendor:

 

YOSI VENDOR: "KUMUNOY"

Titik ni Che Vista

 

Ito ang ating tahanan

Isang mabahaong basurahan

Na kung tawagin ay lipunan

 

Laganap ang kahirapan

Lumalala ang karahasan

Tao sa tao naglalaban

 

Lipunang basurahan

Kinakainan, kinalalakhan

Inaaralan, dinadasalan

 

Humihilang pababa

Kumunoy, kumunoy

Unti-unting pumapatay

Kumunoy, kumunoy

 

Ito na ang sistema

Wala na tayong magagawa pa

Mabubuhay at mamamatay

Walang pag-unlad ang buhay

 

Kumunoy, kumunoy

Walang atrasan

Kumunoy, kumunoy

Dahan-dahang kamatayan.

 

INTERMISSION

 

ACT II

 

SCENE 1

 

Isang inang probinsyana ang naghahanap ng kanyang anak na naglayas at balita niya’y nagtatrabaho sa lugar na iyon. Ermita sa umaga. Uulita ang SCENE3 ng ACT I kung saan ang mga puta ay ginagamit na set pieces. Aawit ang inang probinsyana habang nililigid ang Ermita at hinahanap ang anak.

 

INANG PROBINSYANA AT YOSI VENDOR:

"METAMORPOSIS"

Titik ni Augie Rivera, Jr.

 

IP: Anak, nasaan ka na ba?

Sabi nila’y uod ka na

O mahinhin ong mimosa

YV: ngayo’y laging nakabuka

IP: Munti kong rosas na banal

YV: mga talulot ay bakal

At nektar ay artipisyal

IP: Dati’y mistula kang istatwa

YV: Ngayo’y magaslaw siya sa mesa.

IP: Mga pilapil na tahak mo

YV: Ngayo’y mas maputik na Ermita

IP: Bituin na dati mong liwanag

YV: Disco Layts sa matang nabasag

IP: Kagandahang noo’y busilak

YV: Kubliha’y koloreteng tambak

IP: Kutsinta noon sa kandungan

YV: Ngayon ay Halimaw ng Laman

Mga pitaka ay may laman

IP: Anak, uod ka man ngayon

Ito ay para ka maging

Paru-paro rin bukas

 

Makakakita ang inang probinsyana ng isang tympok ng mga inang nagbibinggo: ang mga Inang Kunsintidora! Tutuksuhin siya ng mga ito na pabayaan na lamang ang anak.

IK1: Naku huwag mo nang hanapin ang anak mo dito dahil hindi mo na makikita iyon

IK2: Siyanga naman. At bakit gusto mo pang alisin dito ‘yon. Yung anak ko nga ang husay ng kita. Yan pa nga ang ikinabubuhay namin

IK3: Yung anak ko nga e nasa Istets na ngayaon at nakapangasawa ng Kano. Ayun lagi akong pinadadalhan ng dolars!

IK4: At saka siguradong nag-eenjoy na dito iyon kaya hayaan mo na!

IK1: Paano namang hindi e mas masarap yatang makipaghalikan sa mga Kano kesa sa mga kalabaw sa probinsya ninyo.

(Magtatawanan)

 

mapipikon ang inang probinsyana at akmang lalaban nang nabigla silang lahat sa nakita: may mga pari at mga opiosyal ng pamahalaan na darating upang magsagawa ng clean-up drive sa Ermita. Magsesermon ang pari at magbibigay ng katakut-takot na pangako ang politicians. Sila ay magsasayawan habang umaawit. Papasok ang mga manang at pulis at kasama ang mga ina kunsintidora at inang probinsyana at magiging back-up ng pari at politicians.

 

PARI AT POLITICIANS: "MORALIDAD"

Titik ni Maan Juat

 

Pari: Hoy mga babaeng makasalanan

Init ng impyerno’y naghihintay

Si Satanas at ang mga diyablo’y

Magsasaya sa inyong pagkamatay

 

At ang mata ng Diyos sa langit

Ay nakatitig sa inyong lahat

Kahit sukdulan siya ng bait

Ay isisigaw niya sa tindi ng galilt

 

Korus ng Manang: PARUSAHAN!!!(4x)

 

Politicians: Kababayan kong minamahal

‘wag na kayong mag-alala

Kapag ako’y inyong inihalal

Ang kadilimang ito’y mawawala

 

Ako ang solusyon problema

Ako na ang in-charge sa Ermita

Kung ako’y inyong isasabalota

Ay tutulungan ko ang bawat isa

 

Korus ng Puta: TUTULUNGAN!!!(4x)

 

Pari: Hindi lalagpas sa mata ng panginoon

Ang kasalanan at kamunduhang ito

Mga Kampon ni Lucifer!

Mga lahi ng demonyo!

 

Korus ng Manang: PARUSAHAN!!!(4x)

 

Politicians: Ako ang pag-asa ng lipunan

Kaunlaran at kalayaan ng bayan!

 

Korus ng Puta: KALAYAAN!!!(4x)

 

Korus ng Manang: NAKAKADIRI KAYO!

MGA TAONG WALANG MODO!

QUE HORROR! O BIRHENG MARIA!!!

HALLELUJAH!!!!

 

Korus ng Puta: LUYA, LUYA

 

Lahat: Aaaaaaaaaa-----MEN!!!!

 

Pagkatapos ng kanta ay lalabas lahat ang mga tao. Maiiwan ang mga putang ginamit bilang set pieces.

 

SCENE 2

 

Papasok ang mga doktor at nars upang isagawa ang VD testing. Ang test ay isang mabilis at masayang sayaw at galaw. Matapos ang sayaw ay makikitang may mga hawak ng pink card ang mga puta, ang mga "lisensya" nila.

 

SCENE 3

 

Didilim nang bahagya ang entablado maliban sa isang bahagi kung saan makikita ang isang matandang puta na namamatay sa sakit na AIDS. Pinapayuhan niya ang waitress na maging maingat at matatag.

 

AIDS VICTIM: "MGA HULING SANDALI"

Titik ni Augie Rivera, Jr.

 

‘dantaon na ang lumipas

tinig ko ngayo’y tumatagas

kasabay halos ng pagtakas

na nalalabi pang mga bukas

 

tinig kong limot na ang pag-awit

ngayo’y pilit na namimilipit

habang bumabangas ang pulang araw

upang bawiin ang kanyang tanglaw

lumalatay na ang ginto sa binti

paglao’y sa lupoa itutupi

tulad ng nabubulok na mithi

ililibing na lang ng pighati

 

halimuyak na naligtaan

bubuyog ba ay nasaan

nasaan din ang dating kinang

sa kakakula’y kinalawang

 

‘dantaon pa ang darating

sana’y tulad ng dati pa rin…

ngunit sinisipsip na ng hangin

 

ang kandila kong aandap andap

tulad ng pundidong alitaptap

sa kadilima’y nagsisikap

naghahanap at nangangarap

 

nais ko uling umawit

hanggang may dantay pa ng init

at namnamin bawat pintig

bago mapipi ang tinig.

 

Pagkatapos ng awit ng matandang puta ay may lalapit na parokyano. Tatanggihan niya ngunit tatanggapin rin ng waitress.

 

Pagkatapos umawit ng matandang puta ay aawit ang Yosi Vendor

 

YOSI VENDOR: "HANGGANG KAILAN"

 

O, babae ng Ermita

Kailan ka ba madadala

Pakinggan mo ang babala

Ng mga nakaranas na

 

Sa kabila nitong sumpa

Sakit na nakakahawa

Arya ka pa rin ng arya

Nabibighani ng pera

 

Bakit hindi maubusan

Ng puta sa ‘yong lansangan

Ermita ang kasagutan

Sa kumakalam na tiyan

 

Bakit, o bakit nga ba?

Anong klase itong sistema

Katawan ay binebenta

Hanggang kailan o Ermita?

 

SCENE 4

 

Mririnig na muli ang takatak ng Yosi Vendor at magsisimula na naman ang eksenang Ermita sa Gabi. Magliliwanag na muli ang buong entablado. Magkikislapan ang mga ilaw. Maingay. Tawanan. Sayawan. Halikan, landian at kung anu-ano pang kalaswaan. May mga nagsasayaw na macho dancers at mga talop na babae. Enter again rally. Patuloy pa ang kalaswaan hanggang dumating ang mga pulis at magkaroon na naman ng isa pang raid. Makaakrinig ng isang malakas na putok at makikita ang waitress na pinoprotektahan ang isang aktibista. Dadalhin ng mga pulis ang mga puta kasama ang Waitress. May papasok na magsasayaw na mga pulis na may dala-dalang bars ng selda. Didilim ang bahaging ito ng selda.

 

SCENE 5

 

Sa natitirang bahagi ng entablado ay may liwanag. Madaling araw sa Ermita. Kakaunti ang mga tao sa kalsada dahil sa raid ng nakaraang gabi. Mayroon pang mga batang prong naggagala. May isang pedophile na hinahalay ang isang bata. Darating ang isang pulis at huhulihin siya. Maglalabas ng dolyar ang pedophile at iaabot niya sa pulis. Kukunin ng pulis ang pera pero lalagyan pa rin ng handcuff ang mga kamay ng pedophile at huhulihin. Lalabas ang pulis na kaladkad ang pedophile. Maiiwan ang batang kasama ng pedophile at aawit tungkol sa buhay at pangarap. Ang Yosi Vendor na nagmamasid sa pagitan ng selda at Ermita ay makikisabay sa awitin ng bata.

 

YOSI VENDOR AT BATANG PRO :

"BUHAY"

titik ni Joel Sevilla

BP: Bakit ba ganito ang mundo?

Puro dusa, away at gulo

YV: Bata, o bata

Huwag kang mabahala

Ang buhay ay sadyang ganyan

May luha, may tuwa

May takot at may saya

May damdaming magkakaiba

At huwag kang mag-alala

BP: Pangarap ko’y makapagkolehiyo

Marangyang buhay, hindi tulad nito

YV: Tulad mo, ako’y nangarap din

Kasawian ang naging akin

Kaya tibayan mo ang iyong damdamin

Pag-asa laman ang laging isipin

At bukas sa iyong paggising

Ang buhay mo ay magbabago rin

BP: Bakit pa tayo naririto

Sa lansangang walang puno’t dulo?

YV: Bata, o, bata

‘wag kang mag-apura

Ang nais mong kasagutan

Ay iyong makakamtan

Ngunit sa ngayon ay maghanap sa dilim

At makinig sa bulong ng hangin

At bukas sa iyong paggising

Ang buhay mo ay magbabago rin

BP: Sino ka ba at sino naman ako

Sino ba tayo dito sa mundo?

YV: Tayo’y mga taong bulag at bingi

Walang kilala kundi sarili

Kung tayo’y magpapakatao

Mapapawi rin ang dilim

M,agtutulungan, magbibigayan

Pagmamahal ang siyang tandaan.

 

SCENE 6

 

Liliwanag ang bahagi ng selda. Magkakatuwaan ang mga babae. Isasalaysay ng waitress kung paano siya nakapasok sa ganoong trabaho. Sasaliwan ng sayaw ng lahat ng babae ang awit ng waitress.

 

"ARAY"

titik ni Melo Torres

 

Aray!

Ako ay labing apat

Nang mabansagang darat

Nagpahawak sa kamay

Pinalayas tuloy ni Nanay

Umiyak nang umiyak at ang sabi ko’y

 

Ref. ARAY! ARAY! Ayoko nang mabuhay

Kapag ika’y babae, o kay dami mong aray

ARAY! ARAY! Hindi na ako nasanay

Bawat minuto ay isang aray.

 

Napdpad sa Maynila

Pumasok bilang yaya

Ang bata ay napilay

Nagalit ang may bahay

Ginulpi at pinalayas at ang sabi ko’y--(Refrain)

 

Nagpunta sa Ermita

Naging isang hustisya

Natipuhan ng yakuza

Dinala ako sa kasa

Nang ako’y mabinyagan, ang sabi ko’y—(refrain)

 

Nang matapos pagsawaan

Ako’y pinagpasapasahan

Nang ako ay matauhan

May laman na ang tiyan

At ang sabi ko’y – (refrain)

 

Ngayo’y kulang ang aking buhay

Kung hindi umaaray

Lagi kong hinihintay

Hinahanap ang ARAY!

 

Aray! Aray! O kay sarap ng buhay

Kapag ika’y babae, kay sarap mong umaray

Aray! Aray! Ako’y di na nasanay

Sa mga gabing walang aray!

 

Liliwanag ang kabilang bahagi ng entablado at magiging bahagi ng presinto. Papasok ang mga pulis para pagalitan ang mga puta sa ingay ng kanilang kantahan at tawanan. Maya-maya ay papasok ang isang pulis na may akbay-akabay na isang Dancer, na natagpuang kakalat-kalat sa daan na bangag. Mamumukhaan ng Waitress ang Dancer.

 

WAITRESS: Anong nangyari sa’yo? Hindi ba nasa Japan ka na? Anong ginagawa mo rito?

 

Bahagyang didilima ang selda. FLASHBACK. Lalabas ang mga dayuhang Hapo, Alemean, Swiss, Awstralyano. Makikitang binubugbog ng Bugaw ang Dancer at pinipilit sumama sa mga dayuhang ito. Ipapakita ito sa pamamagitan ng sayaw at galaw. Makikita ring dumadaan ang ilang alagad ng simbahan at pamahalaan na dumadaan ngunit nagpapanggap na hindi nila nakikita ang nangyayaring ito. (DANCE APACHE)

 

Darating bigla ang Singer at ang Callboy pagkatapos ng sayaw ng Dancer. Isasalaysay nila kung paano sila unti-unting nakapagbagong buhay. Namasukan ang Singer bilang katulong. Si Callboy ay nagtrabaho sa isang konstruksyon. Hihikayatin nila ang Waitress na magbagong buhay na. Sila ay aawit ng koro ng "Bagong Buhay"

 

Sasabad ang bangag na Dancer at sasabihing wala na talagang pag-asang makapagbago ang mga tulad nila. Aalis ang Singer at ang Callboy at mangangakong magbabalik, at umaasang makapagdesisyon na ang Waitress.

 

Pagkaalis ng dalawa, mapag-iisip-isip ng Waitress na wala ngang gaanong opurtunidad para sa mga katulad nila. Patuloy pa ang pang-aabuso at kahayupang dinaranas ng mga babae. Magpapasiya siyang maging aktibista at tumulong sa paglaban ng pang-aabuso sa kababaihan. Kasabay ng mga isiping ito na naglalaro sa kanyang utak ay kung sino ang dapat niyang paniwalaan: ang Dancer o ang Singer? May buhay pa nga ba ang isang tulad niya sa labas ng Ermita? Aawit ang Waitress tungkol sa mga bagay na ito. Siya ay naghahanap ng kasagutan.

 

WAITRESS: "DILEMMA"

 

Mula pagkabata

Babae’y nagtatrabaho

Nagluluto naglilinis

Habang si kuya’y naglalaro

 

At sa paglaki niya

Sa Maynila mamamasukan

Magluluto, maglilinis

Isang dakilang utusan

 

Kung siya’y mag-aasawa

Sa mister maninilbihan

Magluluto, maglilinis

At bubuntisin buwan-buwan

 

Kung lahat ay pantay-pantay

Bakit ang kababaihan

Mula bata hanggang may bahay

Tagaluto, tagalinis

Ng kalalakihan

 

Ano nga bang nalaman

Ng ating kababaihan

Kundi mga gawaing bahay

Yan ang turo ng mga nanay

 

Kung magiging empleyado

Saan naman magseserbisyo

Kahit saan siya magtungo

Ang naghahari ay lalaking amo

 

Salesgirl, sekretarya, weytres

Dancer o puta

Yan na lang ba

Ang kanyang makakaya?

"BABAENG ERMITA"

 

May buhay pa nga ba

Sa labas ng Ermita?

May lunas nga ba

Ang sakit ng Ermita?

Mga babaeng Ermita

May bukas pa kaya?

May magagawa pa ba?

O, meron ba?

 

Kumunoy ng Ermita

Ako’y pakawalan

Kumunoy ng Ermita

Sa’yo ako’y lalaban

 

Mga babaeng api

Mga babae ng Mabini

Gumising, bumangon

Ipagtanggol ang sarili

Ikaw ay tao

Gawa ng lumikha

Kapantay ay kahit sino

Sa mundo

 

PUTA: Kumunoy ng Ermita

Kami ay bitiwan

Kumunoy ng Ermita

Kami’y huwag mong pigilan

 

P&W: Kumunoy ng Ermita

Kami ay pakawalan

Kumunoy ng Ermita

Kami, sayo’y lalaban

 

Pagkatapos ng awit ng Waitress, papasok ang buong cast sa iba’t-ibang composite poses. Kakanta silang lahat ng "Ermita Ngayon". Papasok ang anim na binibini at kakanta ng "Ermita, o, Ermita" at sasabayan ng Singer, ng Dancer at ng Waitress. Malulunod ang awit ng cast at mangingibabaw ang kanta ng siyam na babae. Pahina nang pahina ang mga awiting hanggang magtigil. Mahinang maririnig ang pasulpot-sulpot na paanyaya ng mga puta sa mga dayuhang parokyano nila. Unti-unting magdidilim ang entablado.

 

DIDILIM

 

 

 

 

 

 

 

|HOME|